Antica Birreria Pedavena Trento... "El temp al Pedavena"
Mi son el spirit del temp. Cognosso, a menadè, la storia de tut e de tuti.
La lezo sule rughe dei vèci, nei odori del bosch, nel pianzer del vent sui muri dele case, che i me parla e i me conta chi che ère voialtri e chi che sarè. Girando fòr per Trent, 'n odor de sàori antichi su taole de legn el me ciama. Quà e là migole de pan de segàla che se smissia al profumo de 'na bira ben s-ciumada e a quel odor forte e lizer al stess temp de crauti e luganeghete, de goulasch e fasòi. Del temp che è nà, ensoma.
Son al Pedavena, la bireria Pedavena de via Santa Cross, fòra en Borgonof. L'è 'n angol de zità che algeri era periferia e adess l'è zentro, che pù en mez no se pòl, ma l' è anca en tòc de storia e de còr dei trentini...
...Ghè ancor Cecco Beppe fòra a Vienna. Chi a Trent en te qualche ostaria i se bina quei della «Lega Nazionale» -i ghe diss «i redentisti»- e fra krìghei de bira e quarti de vin zà palpita l'anima 'taliana de Trent. L'onorevole Battisti con en zerto Mussolini i ciapa el fresch soto le pergole del Pedavena e proprio quà en de sta ostaria , caro sior, endo che adess lù l'è sentà a bever bira, i tegniva banc.
Fra i so' krìghei, generazion entreghe à passà momenti lieti dela so' esistenza, à ritrovà en soriso, à parà zo polver missiada al sàor de no gàver pu nient dopo la guera. Sempre lì, sempre al Pedavena. E quanti èi stadi i zoveni che i s'à sgàsoladi a balar nel teatro che ghèra de drio? E le comedie en dialèt del Club Armonia, prima dela guera?
Core la storia davanti ai me òci. L'è la fin dei ani setanta, ani de crisi nazionale: 'na domenega si e una no en bicicleta, le bombe, el terorismo, el movimento studentesco. Ma el Pedavena, come Minosse fòr en piaza Dante, nòl se mòve, nòl segue mode e l'acèta tuti con en soriso e con quel odor de wurstel che te penetra i vestidi e la pèl, per entrar nei to' ricordi e nei to' afèti. Dal '79 l’è i Ghesla che lo gestiss eal vècio Pedavena i ghe vòl subit ben.
El digo per quèi pòchi che ancor no lo sa: l'è l'unica bireria trentina restada ormai. L'è ben vera che Trent l'è 'na zità che cambia, ma forsi l'à anca pers, en de 'sti ani, 'na zerta identità. Se la trova, sconduda, sol en zerti àngoi. E lì, fra el fum dei zighereti e l'oro dela bira, fra saori mediteranei e zent de altre tère, torna prepotente quel spiritèl riservato e alegro, forsi en poc scontros, ma semplize e bon che l'è l'anima trentina. L'èi lì, soto la pèrgola, che la beve 'na bira al Pedavena.
Ancoi l'è l’Andrea Ghesla, el fiol del Giuliano , che coi 'so colaboratori l'è el cor del Pedavena. Nè a trovarlo se volè veder ancora la Trent de algèri, precisa, anca doman.
21 Novembre 1993
